MULE-CAZERIUS

MULE-CAZERIUS

alius praefati Regis fil. quem Pater ex Cordubensi Christiana femina susceperat, victô captôque Patre in Urbem a civibus, cum reliquiis exercitus, receptus, et Rex dictus est, eâ conditione, ut quam primum Pater liberatus esset, ipse Regnô cederet. Mox, cum paternae cladis causas superstitiosi Mauri assignarent, quod is a Christianis vinum Fezzam importari passus esset et leones aluisset, protinus quidquid erat vini in cellis per Urbem effundi et leones sagittis iussit configi. Patri dein, quem durissimis conditionibus liberum dimisit hostis, sponte regnô cessit: vix autem elapsis duobus mensibus, urbe Fezzâ a Scirifio occupatâ, denuo cum Patre in hostis potestatem redactus, Tarudantum ab eo, unâ cum fratre Nacerio, ablegatus, ibique paulo post a Praefecto, Scirifii iussu, iugulatus est. Vide Thuanum Histor. l. 7.